中環在線：「咬低」基金經理貓咪係揀股專家

貓貓拋玩具鼠揀股，竟然贏到三位基金經理，盲拳果然打死老師傅，亦令人進一步懷疑，政府話可以用來養老嘅MPF係咪所托非人！
英國《觀察家報》舊年搞咗個鬼馬投資比賽，形式有啲似《300萬爽組合》，三位基金經理、一班中學生同埋家貓Orlando分成三組作賽，每組有6.2萬（5000英鎊）做本，規定喺富時指數裏面揀5隻股，每季可以換馬一次。

玩具鼠幫拖　埋單贏一成

基金經理組梗係用投資經驗、傳統揀股方法做投資，貓貓Orlando就用佢心愛嘅玩具鼠，掟去一張印有唔同股票冧巴嘅格仔紙來揀股。
截至舊年9月底，都係由基金經理組以一成領先，貓貓贏6%，奇妙嘅事情發生喺第四季。
基金經理組可能諗住贏開，第四季唔換馬，點知其中兩隻股突然跌近兩成，拉低成個投資組合嘅表現，埋單只贏3.5%。相反，貓貓換走一隻輸錢嘅投資信託，成個組合喺第四季發力升，埋單贏10.8%。學生組就輸錢包尾。
呢個比賽結果對股民應該好有啟發性，原來「亂來」都係一個投資策略，基本分析、圖表分析都可以行埋一邊，提出random walk hypothesis嘅經濟學家Burton Malkiel先至係股神，佢老早就話股價走勢相當隨意，因而令到股市難測。
其實講到明係股市，梗係要「估」㗎啦。

李華華

(http://hk.apple.nextmedia.com/financeestate/art/20130116/18135441)