沙膽虹　今年揀大路股

沙膽虹個倉，好貫徹佢話「紀律比揀股重要」呢個原則，主要揸住瑞房（272）、壹傳媒（282）幾隻股，甚少買來賣去。但2013年「爽組合」有新玩法，每月埋單玩淘汰，可能要炒番轉有爆升潛力嘅細價股或窩輪先有勝算。
偏偏沙膽虹話細價股唔係佢專長，今年揀股以大路為原則，投資策略都係因時制宜，舊年買開嘅股份，有一、兩隻今年會繼續買。睇到呢度，大家心裏面應該問緊：咁即係點呀？有乜投資心得呀？答案係冇，沙生話投資全靠運氣！
首次落場、高登仔至like嘅大師沈振盈，開宗明義要挑戰沙膽虹，佢已經諗好投資策略，打算用盡一成資金限額買輪證，用來食糊，其餘資金就買中資同藍籌股。藍籌股作為倉底，佢揀平保（2318）、港交所（388）同中移動（941）。

周顯　唔搶買細價股

細價股專家周顯雖然狂鬧每月計數呢個玩法違反股票常識，認為至少要睇半年表現先合理，但佢為咗贏錢都要玩埋一份。
周顯精於投資有爆升潛力嘅細價股，照計好有優勢，點知佢話細價股交投疏落，靜靜雞收集就易，喺報紙開晒名話買，散戶搶埋一份，根本好難買到，實際操作困難。
所以呢，周顯玩「爽組合」係買大路嘢為主，預告呢個星期先買10萬股新濠（200），成個倉唔多過5隻股票，費事睇咁多隻股票咁煩，亦唔炒輪證。
新年伊始，預祝九位參賽者旗開得勝！

李華華

(http://hk.apple.nextmedia.com/financeestate/art/20130102/18120220)

睇 iMoney 個個星期排哪個財演上星期的推介升得最多，現在這個「爽組合」遊戲又定下月月淘汰參賽者的規例。就是這些傳媒鼓吹這些超短視的投資心態，令香港散戶們買股只求3、5%就走人，跟你買贏幾多粒糖都唔夠一個浪冚埋來時輸啦！