今日港股一支大陽燭低位反彈，好靚仔！其實上星期四晚美股彈近200點時，就已經好希望可以在星期四的長尾巴後星期五可以有這樣子的大陽燭！現在遲了一天出現，希望見底的訊號沒有分別啦！

這次不是馬後砲，上星期末已經察覺到本地地產股似乎見底，不過就是欠今日這種走勢去確定！你看看1號仔、16號仔、4號仔、17號仔等等，全部的陰陽燭形態不是疑似早晨之星就是曙光初現，加上今日的走勢兼氣勢就啱啱好！

如果選最標準的，則一定是領匯 (0823.HK)！自5月中由＄46碌落來，上星期二一支大陰燭跌穿＄37後，星期四 (星期三端午節假期) 先低開再由頭抽升到尾，一支大陽燭收市而且深深的嵌入之前的陰燭燭身內，成交還要比之前多！星期五再來一個 gap up 收陽燭，實在無乜理由會再跌穿個裂口！

今個星期的大件事，就是週中美國聯儲局議息，和跟著伯老的講話。認識了伯老咁多年 (當然是我識佢但佢識我係老鼠！) 都知道他最叻就是 expectation management。最近吹一吹收水風，債市股市匯市已經是一石激起千層浪的模樣，跌到阿媽都唔認得。所以我覺得這次伯老又會餵大家食粒糖，話未必咁快退市住嘅……

果真如此的話，對息口特別敏感的本地地產股和 REITS 就可能更加在見底後一舉爆上？！

根據以上我自己的推測，我今早開市就已經買了一抽本地地產股的 call！伯老，你唔好玩嘢呀！