今日大市放量大升，清脆地用大陽燭向上抽穿整整一星期的徘徊區頂部21000。今朝我沒有跟實個市，當我見到大市的強勢時已經是11點，恆指已上到212xx。

正如我之前所講，早排因為見大市似無力再上出了貨，但如果它可以抽穿21000我就會追番貨。所以我手起刀落，10分鐘內已買了多隻股票，主要仍然是用 call warrant，貪佢自動保護了我的 downside。

點解我可以係10分鐘內咁快就入齊貨？要知道雖然過去一星期大市唔上唔落，我忍住手不買不賣，但不代表我坐係度乜到唔做。我仍然好俾心機睇圖，揾定目標，例如哪些股票是強勢回吐、哪些股票是正在侍機突破、哪些股票似見底回升。當我要 action 時只要立刻開幾個圖望望就知道買邊隻。正如俗語有云：「機會是留給有準備的人！」

股票選擇方面，我會優先考慮之前走貨時走了的股票。因為之前走貨時托賴大部份都是賺錢貨，現在於高位再買回的心理壓力會細d (“最多將賺咗嘅輸番少少出嚟！”)，自己亦對它們的 rhythm 比較熟識。

今天上破21000關口之後，我相信恆指應該就會直上挑戰去年8月留下的大裂口頂部21700。當然，今日是第一日突破，不能排除只是假突破的可能性。如果這兩天又跌到21000之下就真的要打醒十二分精神，小心散水了。

去年9月時寫了一篇《我唔會買領凱囉》，上個 weekend 讀蘋果日報又見到知音人！

《我唔會買領凱囉》
https://investplato.wordpress.com/2011/09/27/%E6%88%91%E5%94%94%E6%9C%83%E8%B2%B7%E9%A0%98%E5%87%B1%E5%9B%89/

周日趣 BLOG BLOG：超人新樓　買唔落手

上周有單地產新聞，地產經紀勁蝕百萬沽出大圍名城二期盛薈，屬典型「喺度食又喺度痾」出事個案。查實經紀落場玩好平常，但事先應知道樓盤有冇水位先好出擊，牽涉到 800萬銀碼，落注前更要慎重考慮。該經紀好彩避得過額外印花稅（ SSD）影響，但就避唔到長實劈價賣樓，要怪只怪他錯信李嘉誠。
問過地產版同事，近幾年買超人樓，認真濕滯，該經紀喪蝕只是冰山一角個案。由 2008年至 2011年 3年間，長實推出 3個大型新盤，分別為將軍澳日出康城、大圍名城一至三期，以及何文田半山壹號一、二期，大部份開價一期低過一期，即買即坐艇。
以名城為例， 2010年 3月首推即供呎價貼近 8900蚊， 8個月後再推第二期盛薈，撞正 SSD出招，即供呎價落到 8326元，較首期平 6%，過多 1年推三期盛世，即供呎價再跌至 8109元，較首期平近 9%。今次經紀買盛薈輸百粒未算最慘，早前已有業主連同 SSD勁蝕 200萬元。

首都四年僅升 3%

股榮揀選 08年至 2010年非超人新盤作比較，大家不妨作為參考（見表）。 08年荃灣御凱首批呎售 6015元，與現時平均呎價 9250元比較， 3年半升值 53%，至於 08年 2月開售的首都， 4年間僅較現時市價高 3%。再睇 09年，銀湖．天峰以每呎 4648元即供價開售，現時市價每呎 6575元，升幅 41%，同年領都、領峯以呎價 4700元開售，相對現價，高水不足一成。至於毗鄰為屋村、包裝成豪宅的半山壹號，一期首批開售呎價高達 1.53萬，較現時市場 1.01萬平均呎價，足足跌了 34%。或者你會話，領峯、領都同首都對比市價，家都有賺 3%至 8%。但如果你比較同年其他非長實新盤，你會發覺人買樓、你買樓，點解人哋賺三、四成，你就賺 3、 4%，賣咗層樓，俾完律師、釐印費，到頭來分分鐘得個桔。

遇上經濟逆周期，樓價跌無可厚非，惟有逆來順受。但在過去 3年樓市狂熱期間，買超人樓居然未有升值效果，部份更要淪為樓蟹。反觀其他發展商新盤水漲船高，如果我係超人新盤業主，我會眼紅，感覺絕不好受。
過去數年記者會，李嘉誠總以「量力而為」回應現時是否買樓合適時機。做完統計，我開始明白箇中意思，「輸唔起就唔好買啦！」
股榮

(http://hk.apple.nextmedia.com/template/apple/art_main.php?iss_id=20120205&sec_id=15307&subsec_id=15320&art_id=16042663&cat_id=15417660&coln_id=15417661)

唔買領凱，唔買名城，唔緊要。仲有天宇海！

平台大宅貼地面 天宇海被轟誤導 長實：樓層獲政府審批

【明報專訊】長實（0001）馬鞍山樓盤天宇海再被投訴把地面命名平台。無綫新聞昨報道有業主花700萬元，購入位於5樓下面的平台「海畔花園大宅」，收樓才知單位處於馬路旁，甚至矮過雙層巴士，直言感覺「好像被騙」。立法會議員及學者均指發展商誤導。

(http://hk.news.yahoo.com/%E5%B9%B3%E5%8F%B0%E5%A4%A7%E5%AE%85%E8%B2%BC%E5%9C%B0%E9%9D%A2-%E5%A4%A9%E5%AE%87%E6%B5%B7%E8%A2%AB%E8%BD%9F%E8%AA%A4%E5%B0%8E-%E9%95%B7%E5%AF%A6-%E6%A8%93%E5%B1%A4%E7%8D%B2%E6%94%BF%E5%BA%9C%E5%AF%A9%E6%89%B9-211515683.html)

大行紛急推「冧把」供客瘋炒 恒指升穿21000 直逼牛熊線

【明報專訊】近日市場氣氛轉好，各大行暫時將年初「先低後高」的港股預測拋諸腦後，紛紛出報告調高大小股份目標價，提供大量「冧把」供客參考。……

…… 去年底還對股市保持審慎的瑞銀中國策略師唐志剛於周一(2月6日)發表報告，推介10大買入股份，3日之後全部錄得升幅。其中以安踏(2020)表現最為標青，累積升23.2%，同時獲點名的金隅(2009)及保利協鑫(3800)，股價亦彈升逾13%(見表)。……

(http://www.mpfinance.com/htm/Finance/20120209/News/eb_eba1.htm)

我最愛就是看到這些 numbers！不是因為我可以不用腦跟住買，這一年來的市場對我的密集式訓練已經教曉我跟風買 number 通常都是沒有好下場的！所以我對這些推介已經免疫了。但由於我做的是技術分析，我需要這些 number ideas 去從香港幾千隻股票中發掘出圖表上有 potential 的。要知道大部份的圖表 (我) 看出來都是無乜 conclusion，看不透是升是跌，所以可以做的就是多看圖，希望從中見到一些靚圖表又靚價的股票，尤其是現在個市已經升了這麼多的時侯！要高追就一定要從圖表中找出還可以高追的理由。

講開又講，這幾日見到個市唔上唔落，我個心都有d十五十六… 不過今日諗，如果一隻股票由高位大跌後在低位整固，還要有超大成交都跌唔落，我會視這為見底 signal，再留心它是否真的轉勢。現在的恆指是不是正正在做這個的 opposite？低位大升後… 高位整固…… 超大成交都升唔上……… 請注意：國企已率先跌破高位徘徊區底部 11500！

故事重溫：投行炒人故事的另一面：鬥快舉手等起身 (https://investplato.wordpress.com/2012/01/20/投行炒人故事的另一面/)

超級肥雞餐，夫復何求！

中環在線：三星肥雞餐　賠足兩年

呢排香港證券界持續刮起寒風，一時美資大行裁 100人，第二日歐資大行又炒 200人，搞到市場風聲鶴淚，人心惶惶。不過，華華聽到上個禮拜啱啱收到大信封嘅香港三星證券員工，個心一啲都唔寒喎，皆因收到差唔多等於 2年人工嘅超肥雞賠償！
有老友記同華華講，上個禮拜決定結束香港證券交易業務嘅韓資三星證券，每個員工平均都賠成 1至 2年人工㗎，有啲仲筍到賠多過 2年㖭。老友記話，賠咁多係因為三星 09年入香港嗰陣，大家對佢無乜信心，所以寫明要包 3年人工，先賠到咁多咋。
喺美資投行打工嘅老友記話，好多證券行裁員都係跟勞工法例賠㗎咋，即炒咪俾多一個月囉，試過有歐資行衰到將個部門結束，連額外要俾嗰一個月都慳番。老友記好認真咁話，佢都想老闆即刻炒佢，然後賠兩年人工，玩番 1年半載，等歐豬搞掂哂啲債先再戰江湖。
點都好啦，原本喺香港有超過 130名員工嘅三星，上個禮拜裁咗超過 84%嘅香港員工，令香港財金界傳聞累計裁減嘅員工總數增至逾 600名，華華希望唔會再增加啦！

(http://hk.apple.nextmedia.com/template/apple/art_main.php?iss_id=20120206&sec_id=15307&subsec_id=15320&art_id=16044816&cat_id=6271925&coln_id=6339612)

對於昨日港股回調，大部份我讀到的意見都是「這只是上破21000點前的小回調，恆指破關指日可待！」咁我就有d驚… 雖然我見到過去一個月長升長有的大市都好亢奮，但人人話好時就很可能是反高潮之時！

我只是一個很水皮的投資者，所以你會見我早兩日才說個市向上跑，昨日已經話見頂。渣呀嘛，無辦法啦，唯有以「靈活」補救啦！現階段我抱著戰戰兢兢的心情，等待以下其中一件事情發生再 react：

1) 假設大市之後會繼續向好，現在趁機 shortlist 一些已破位又覺得基本因素良好的股票，等它們這一浪回調下來到支持位時買入；
2) 大市如大家所預期小回後大舉上穿21000，追貨；
3) 大市回回下跌穿埋202xx的小雙頂的話，我就撬埋雙手等個市跌定再算。

大家記住，股票上上落落有自己的 pattern 和 momentum，不要嘗試用市場上有無好壞消息去估，因為大多數時間這些都只是事後孔明式的解釋。

雖然美股昨晚受1月非農業新增職位遠優預期的消息刺激，道指大升156點，港股很大可能星期一開市即升穿 21000，但小心高位回吐。賺錢的股票應該之前一早買落，如果你今天才發覺你身無分「股」，咁 sorry 啦，你已經 miss the rally，唯有自我反省，下次把握好一點，但千祈千祈唔好現在唔忿氣高追啦！重重暗湧在上頭：

1) 超大量回收價在 21200 之前的熊證，星期一勢必乘勢全宰！但之後呢？高潮過後小心散水！尤其是如果星期一見超大成交，例如1000億樓上，就更大可能會先散一散水！

2) 去年8月形成 21000 – 21700 的超大裂口不要小看，我覺得即使要衝破都未必一下就得；

3) 現在突然似太平盛勢，歐洲美國印銀紙就一天都光晒！市場上樂觀情緒泛濫，小心突然被人插一刀！

4) 我之前讀過一些風水講法，逢大節氣就很可能是轉勢之時。今日是立春，個節氣夠大啦啩？！信不信由你！

我不是說大市又要跌番落 18000，我只是覺得現在快到回氣之時，等大市回氣一千幾百點後再慢慢在已突破股票中揀幾隻筍嘢似乎是更明智！我自己星期一就會適量減持部份。係部份，唔係全部，衡量風險之餘，升市莫估頂！