• About
  • Jailbreakplato
  • 抄雷曼的家

Plato @ Investment

~ Trying to make money out of all kinds of market condition

Plato @ Investment

Category Archives: April 2015

可能係世界上最難買嘅股票

29 Wednesday Apr 2015

Posted by Platoooooo in April 2015

≈ Leave a comment

Tags

0388.HK, 港交所

「世界上最難買嘅股票?係唔係巴菲特隻巴郡 (Berkshire Hathaway, BRK-A) 呀?成廿一萬… 一股喎!美金喎!5股夠係香港買層樓啦!」

唔係!面額貴的股票,有錢就買得到。

小弟覺得,世界上最難買的股票有三種:第一種是你賺過錢的,但沽早咗;第二種是你一沽完就升;第三種是你輸過錢的,輸得越多越難買返。

先講第一種。一隻股票,你跟它無任何「歷史」的話,睇位買貨,easy!但如果你買過它 (過去式) — 可能是實際上買過賣了,又可能是你心裡面想過要買但因為無錢、未到價、忙得滯忘記了等等原因無真金白銀入市 — 當隻股票升上去後,要你再入市就好難了。就算我話你知隻股票今日都只是得3倍PE,你心裡面都一定是在記掛著當日未升高前的入市價,點講今日個價都是貴。譬如近日的港交所 (0388.HK),你可能之前 $150 買了,等呀等呀等,終於今個月突然彈上 $200。「$200 這些齊頭位當然是阻力,食咗先講!」誰不知轉個眼 388 已經是企在 $250。大家都知都見內地的北水向南流,港股成交都去到2000億。「咁快彈升了 $50,等回一回先買」又過兩日已經見 $300!「當日 $200 走咗,唔係今日咁傻仔 $300 買番呀嘛?」

港交所1個月內就又$200去到$300

除了是因為覺得 388 今日個價高了幾十個巴仙, (相對地)「好貴」之外,如果這發生在我身上,還有一個不知是不是我獨有的問題:明明好有眼光地 $200 賣了賺到錢,今日又要死死氣 $300 追返入市,唔kur之外,咪好無面?!查實,根本無人知道我 $200 賣了要 $300 追返咁傻仔,無面俾邊個睇?不過,我想可能就是我的男性荷爾蒙作祟,加重了心理障礙買唔落手。

第二種情況上個星期才剛發生在小弟身上。上星期一大市借「丁蟹效應」震倉,小弟一些稍稍高追的股票基於安全理由被震走了 (止蝕),但大市一個屈尾十就升返上去,激死!那班壯烈犧牲的兄弟們,有些我真的十分睇好,但要我低沽後立刻高買返,我覺得好似七七地,而且唔知是否只是自己不憤氣的衝動之擧,到時高位買 -> 止蝕 -> 反彈買返 -> 股價又跌,咪隨時輸得多過唔止蝕?!

第三種不用多說,當一個人輸一隻股票輸到嘔血時,避開它去嘗試「忘記」當日輸鑊甘的那份痛,是作為人類十分正常的反應。在熊市輸錢輸到連股票都不玩了的亦大有人在。其實,相比起第一種,第二種是絕對可以避免的。乖乖的每隻股票定好止蝕,每次都最多輸10%、8%,敗走沽貨後又是一條好漢!

Please come and like my Facebook Page if you find my blog interesting: https://www.facebook.com/jailbreakplato

心態

23 Thursday Apr 2015

Posted by Platoooooo in April 2015

≈ 2 Comments

Tags

0388.HK, 1766.HK, 中國南車, 港交所

如果你上星期讀完小弟篇 blog,放個靚假今日返到,望吓恒指,可能覺得個大市咁靜焗,無乜上落;但其實身在股場的,已經是來回地獄又折返人間了兩次!第一次是上星期五收市後,內地證鑑「提醒」各證券行兩融要小心D,夜期立即插700點 (地獄啊!!!)。點知星期日黃昏,阿爺又突然減1%存款準備金,大家立即返回人間。

到星期一開市,恒指平開,大家心諗無事啦,誰不知下午突然又急插700點,收市都跌500幾點 (又地獄啊!!!) 到星期二大市在中移動 (0941.HK) 的帶領吓回升凸200點。

真係心血少D都唔得掂!

——————————-

在股票市場打滾了一段不短的時間,如果你問我最難是甚麼,我會話是出貨。揀股票,揀時機入貨,功夫都還算可以;但往往是「幾時出貨?」考起了我。現在我已慣性地買入時已經定好了目標價與止蝕價。睇錯時,一切就按本子辦事:跌落來,止蝕 — 止蝕對我來說是一點都不難。但升上去時,到目標價,賣不賣呢?根據 trend trading,有勢喎!無理由就咁賣?但定好了的目標價通常是一些大位,不賣又驚見阻力就回;不貪心賣了又驚一穿就一支火箭升上去…… 尤其是在這個大茶飯時代!

最近對這個入市容易出市難的問題,有一個新的睇法:入市容易因為無貨在手,理智常在;出市難是因為有貨在手,思考上變得主觀,又怕贏少咗,又怕輸多咗,「貪生怕死」令人的決定變得不理智。

我想,一就我 (或者你都遇到這個題的話) 要訓練到自己心如止水,手中有貨,心中無貨… 但係講咁易咩!如果唔係就要定硬性規定一些手則,到目標價如何如何,股價升高了又如何如何更新止蝕 (止賺) 價,一切依本子辦事,無情講!即使定好了手則,其實要跟足來做,都是一樣咁難呢!到時我又會貪心叫自己這次都係唔好賣住啦:「可能仲有得升呢?」、「回咗咁多都係唔好止蝕住啦,等佢反彈d先斬啦」(但反彈之後又會話仲有得升唔斬,結果……)

至於個市,星期二見那些最強勢的「一帶一路」股逆市大插,我相信這一波的調整可能已經完成。可憾的是小弟當日開市時心諗大市星期一已經調整完,一開市就衝入去 $17樓上加了注在中國南車 (1766.HK),結果下午在 $15樓下被震走了,一日隻股就輸多過10%。唉… 還好,我講得出,做得到在 $270 買了港交所 (0388.HK),呵呵呵~~~

中國南車大上後大回調

港交所穿了新高後,阻力變支持,最佳的入貨位

港交所星期一真的回到 $270 靚位,讓大家入貨

其實,如何可以在震走之後再有勇氣衝返入市都是一個好高深的學問,下次再講。

Please come and like my Facebook Page if you find my blog interesting: https://www.facebook.com/jailbreakplato

不太識玩股票的人買甚麼?

16 Thursday Apr 2015

Posted by Platoooooo in April 2015

≈ 2 Comments

Tags

0388.HK, 2800.HK, 2822.HK, 2828.HK, 盈富基金, 南方A50, 恒生H股ETF, 港交所

本港股市上星期放了幾日煙花,這個星期歸於平淡,也屬正常。雖然現在是人人看好得有點得人驚,但升市只是一個星期,應該未到頂;而且你讀報紙訪問散戶們,他們口個句忘住大升市嘩嘩聲,身體卻很誠實地趁高放貨,或者 (很理智地) 等高位回吐先買。大家還未瘋癲地追貨,大市又點會滅亡住?

不過我都開始有身邊的朋友,本身不大熟悉股票投資,可能睇得小弟的 blog 多,知道我識少少股票 (奈何未看清其實我是扮代表),問我乜股乜股買得嗎?

其實,這大茶飯時代,只要你開幅股價圖,不必識睇圖表,見隻股票的走勢是向上的,你都可以買。不過你何時應該賣,何時止蝕,才是重點。如果你對此是毫無章法的,我勸你聽了路邊社貼士後,都是想清楚才入市。

如果你真的想在這慶烚烚的股市分一杯羹,又不太識玩,你可以買 Exchange Traded Fund (ETF),因為它通常是代表指數的,會升會跌但不怕執笠。例如你買了盈富基金 (2800.HK),它是追蹤恒生指數 (HSI) 的,股價走勢跟足恒指,你話恒指會否跌到破產跌到0?亦不怕個別公司 touchwood 出事的話,股價暴跌甚至停牌 (甚甚至兩樣齊來) 的話,隨時血本無歸。

想食盡這次中港大茶飯,買 ETF 的話,3隻就夠啦:

1) 盈富基金
2) 恒生H股ETF (2828.HK) – 香港國企指數
3) 南方A50 (2822.HK) – 富時中國A50指數

盈富基金 (2800.HK) 一年走勢圖

恒生H股ETF (2828.HK) 一年走勢圖 南方A50 (2822.HK) 一年走勢圖

你貪心點的,送你多一隻過山車:港交所 (0388.HK)。大茶飯年代港股成交量一定大增,作為全香港最大「賭場」的港交所,你賺錢它收佣,你蝕錢它也收佣,sure win!過去幾天日日2000多億成交已經是比之前高一倍有多,如果之前它值 $150,現在成交多一倍,股價起碼值 $300?!還未計大家興奮炒股時給股票的溢價。這個星期港交所股價升穿了2007年的歷史高位 $268.6,已經是毫無蟹貨,肯定是大市再升的火車頭。你想今日買又得,安全點等回到2007年前高位支持 $270 先買都得,又或者分注逐點買都仲得!

港交所這星期升穿了2007年創的歷史高位!

呀,還有個 friend 問我上一篇話用注碼控制風險,即係點?

因為現在個市已升了不少,每日上上落落幅度更大;而且我話個市會升啫,邊個知?在大家興致勃勃等升市時,都要風險管理跌市時點做。

假設你有廿萬閒錢可以投資,你當然不會準備廿萬全輸,可能你只能忍受輸兩萬蚊,再輸多d就晚晚瞓唔著!以前個市風平浪靜,每日恆指上落二、三百點,你買晒廿萬,定好輸10%止蝕,心安理得。今日恒指癲咗,每日上落五百點都嫌少,高追了股票如果又是定10%止蝕,有機會即買即止蝕,好無癮。所以你可能想將止蝕定遠少少,例如15%,但又想最多輸兩萬,唯有不要咁貪心,買少d,廿萬當中只買十三萬,剩餘的七萬,暖住袋先,等那十三萬賺到錢後,有盈利墊底才再加注。

如果再搏一點,我買窩輪、牛熊證同佢死過!因為這些衍生工具是可以全輸的,所以我就只會用廿萬當中的兩萬買,真的睇錯邊的話都不用太肉痛。記住,千萬不要成副身家放入這些衍生工具當中,它們是可以真真正正的輸死你!

Please come and like my Facebook Page if you find my blog interesting: https://www.facebook.com/jailbreakplato

港股大茶飯

13 Monday Apr 2015

Posted by Platoooooo in April 2015

≈ Leave a comment

Tags

0388.HK, 2318.HK, 中國平安, 港交所

整個星期「港股大時代」五隻字不斷在香港的報紙雜誌的標題中遊走,小弟就覺得這種說法其實有點太文雅,應該直接稱呼為「港股大茶飯」!

先溫故知新,大家由在睇睇今年年頭小弟在報紙 cap 出來各大行對恒指今年的目標價預測。Sorry,2015年才過了一季,已經 game over:All Wrong!

各大行對恆指2015年的目標價

在這個大茶飯時代,亦是人人都是股神的年代。最近小弟都忍不住連續幾篇在推冧把,還好5號仔不在我的推介之內,所以現在可以跟其他財演和各大財經雜誌齊齊大大力眩耀自己有幾勁!鐵建三寶、南北車孖寶、「互聯網+」股全部都中晒,係咪勁先!!

不過如果你曾經歷過2007,甚至是1997年的大茶飯年代,你會知道真正的勁,是要在這種又要驚又要買的時間,克服不敢高追的心理障礙,和能夠在高位 (不是最高位) 交出火棒全身而退。

你打開今日財經版,位位專家一方面話恒指睇32000點,另一方面話等回吐到26000先買貨,幾矛盾!買港交所 (0388.HK) 等回吐到 $200,買平保 (2318.HK) 等回吐到 $95。咁就 very sorry,你只可以望住它們的股價上太空!

等回吐買,是上落市的買法,在這個大茶飯年代,小弟的提議是:

1. 有甚麼心水股,不理三七廿一,瞌埋眼先買一注!這其實應該是上星期三大市一郁,大家感到「今次不一樣」的時候就要做。講真,今天價值近 $300 的港交所,雖然我覺得它才剛突破2007年高位 $268.6 未到價,但我大大聲叫你衝入去我都有點驚你過幾日會在我屋企門口伏我!Anywayz… 因為是高追,所以一定一定一定一定要用注碼來控制風險!你平時買開十萬蚊一注的,今次買三萬?五萬?唔該你自己調整買幾多,最緊要是一買即跌的話,你梗係會唔開心但又未至於瞓唔著。

2. 點解要瞌埋眼先買一注?因為如果個市再升,你賺住錢來加注,個人會理智好多。人天性犯賤,平日自己輸錢但人家輸更多的話,心情都好過點;但人家賺錢自己無份賺的話,就份外眼紅,隨時一下子失去控制就成副身家衝入市 (eg. 2007年32000點時…) 所以如果可以贏住來加注,心情輕鬆得多,入市時的決定都理智得多。至如何時加注,真的是人人不同,有人每升10%加一注,有人逢股價衝高後回吐到10天線加注,小弟就喜歡等回吐後再升穿前高位時才加注。

3. 如果你一買即跌的話,千萬千萬千萬千萬不要溝淡,這是你今次唔死但總有一次會死的做法。

重複: 千萬千萬千萬千萬不要溝淡!

小弟上星期三就正正是如此不問價追入最爆得的港交所、海通證券 (6837.HK)、平保、信達 (1359.HK) call option。

克服了高追之後,如果把握高位撤退?

老老實實,小弟唔知。2007年時小弟都是撤退失敗的一員,望著自己的股票戶口由正好x多都最後變負數。現在在大市未見疲態之時,我仍然是集中於買貨,然後定好止蝕 (止賺) 位,保住利潤。

港交所今天去過$300!

題外話,今日隻388又爆過,午飯後一點鐘開市立即爆一段,由 $280 直飆上 $290,它的 listed option 即時出現奇觀,大家掃 call 掃到 d vol 飆上 90%,但另一邊 put option 無人買,vol 就維持在 50% 左右。通常只有在大市大跌時,人人掃 put 自保,令 put option 的 vol 大大拋離 call option,我就真係未見過調轉頭 call option 被掃高 30 vol!

今日下午港交所的 call option vol 曾經被掃到比 put option 高 30 vol point!

Please come and like my Facebook Page if you find my blog interesting: https://www.facebook.com/jailbreakplato

大奇蹟日 2015?

08 Wednesday Apr 2015

Posted by Platoooooo in April 2015

≈ Leave a comment

Tags

0388.HK, 1359.HK, 1766.HK, 2318.HK, 6837.HK, 大奇蹟日, 平保, 海通證券, 中國南車, 港交所, 信達

2015年4月8日,恆生指數收市報26236,較上個交易日升961點 (3.80%);國企指數收報13396,升733點 (5.79%)。大市成交2500億,創2007年10月3日以來新高。港股通的105億每日額度首次用盡!

恆指終於能成功升穿2009年以來25000點阻力? 恆指今日 gap up 破位,再一支大成交光頭陽燭收市

「恆生指數,之前小弟睇死你升唔穿25000點,係小弟唔著!請你高抬貴手,大爆發前震一震倉落25000左右,等小弟再加點倉位啦!」

今日升市的那種洶湧的勢頭,望著股價跳動時已經心跳加速 high 爆的興奮,收市前最後5分鐘期待著恆指會否升夠1000點,望住個鐘不想股市4點就收爐,感覺似曾相識…… 係啦係啦,就係2007年8月17日大奇蹟日,當日望住恆指由跌1000點倒升400點收市感受過!之後恆指就用3個月時間由20000點升上32000點!

如果你將眼光放在那些二三線股,就更能感覺到今日大市的那份澎湃,升20%、30%的股票比比皆是!好似隻中國南車 (1766.HK,利申:有貨),今日復牌高開28%,夠晒勁啦!收市時升夠44%!死未?這隻可是市值300億非3億的股票呀!

有貨在手的朋友,貼市的早上見到手上股票咁爆發,真是很大誘惑想「食咗先講」!(食完你即日就後悔了) 無貨的除了揼心外,就更加心大心細想「追唔追好?」(無追你就揼春了) 作為一名標準老散,我整朝早都身痕想走貨,不過「贏粒糖」就走正正是我們散戶成日炒輸的主因,所以我整日都一直要用我的左手,㩒實我的右手,慎防一不留神就 click 上網賣了自己的賺錢貨!

香港股票今日2000多億成交,破盡記錄,眼前只有兩條路揀:

Path 1:大奇蹟日 2015!年頭小弟已經早講當人人睇恆指今年見27000,這一定不是今年的高位。現在看,32000點不是夢!
Path 2:如果今日只是一剎那的衝高亢奮,之後恆指又跌穿25000的話,在高位2000多億元的蟹貨成交,大市將會跌得好x甘!有排都無運行!

我希望我們是正處於 Path 1,以近來的消息面 (滬港通+內地的貨幣及對股市的寬鬆政策)、大市的升勢 (恆指今日 gap up 再一支大成交光頭陽燭),我相信現在正走在 Path 1 的機率超過八成。在這種升市當中,無人知道頂點在哪,所以目標價不用定,只需要不斷推高止賺位就可以了。

我都親身感覺到要在大市升時900多點時買貨是有點難,小弟今日都無膽大大力衝入市掃貨,只選擇用 call options 刀仔鋸大樹,不問價追入最爆得的港交所 (0388.HK)、海通證券 (6837.HK,點解中信證券 6030.HK 無 listed option?!)、平保 (2318.HK)、信達 (1359.HK,今日破頂一年高位,是小弟黑馬之選),槓桿式以輸有限搏贏無限!

信達今日破一年高位,黑馬之選

Please come and like my Facebook Page if you find my blog interesting: https://www.facebook.com/jailbreakplato

上了25000,請企穩

07 Tuesday Apr 2015

Posted by Platoooooo in April 2015

≈ Leave a comment

Tags

0042.HK, 0268.HK, 0390.HK, 0553.HK, 0719.HK, 0818.HK, 1033.HK, 1065.HK, 1108.HK, 1186.HK, 1800.HK, 3993.HK, 金碟, 高陽科技, 儀征化纖, 南京熊貓電子, 天津創業環保, 山東新華製藥, 東北電氣, 洛陽玻璃, 洛陽鉬業, 中國鐵建, 中國中鐵, 中國交通建設

通常小弟一講個大市,它就硬是要跟我講的背道以馳!還好雖然我上星期「恆指你穿到 25000 先講」中睇死大市,不過再上一篇「終於有嘢寫! 」揀的個股走勢又隻隻比大市強,而以人類慣性 selection memory 的行為,大家應該只會「選擇」記得我揀啱股票!

其實,上星期瞌埋眼,只要你買的不是叫「匯豐」,跑贏大市有幾難?!現在大市升了一段,真正的考驗才開始!

現在恆指升穿了25000,下一步點做?企穩在上囉!以恆指的性格,它是不會好似A股上證指數般一升20%不回氣的 (不過現在港股又有點A股化的味道),所以下星期復市應該會有以下其中一個情況:

1) 乘勢再升一段,如到25500,然後回吐到25000水平;
2) A股又開始新一輪IPO,港股跟隨回落,隨時穿埋25000。

重點是,回吐過後,能否短期內強而有力的升穿這個新近建立的高位 — 可以的話,就掂啦!升多幾千點我都不會覺得出奇!!

股市估市,是應該有些想像力去「估估吓」,重要的是當結果與自己估的不一樣時,要認衰仔,並立即調整和變陣。

由於小弟估市的記錄強差人意,都是補一補飛寫吓股票。上個星期股仔們和雀亂飛了一大堆,例如再上一篇提過的高陽科技 (0818.HK) 和金碟 (0268.HK) 全部破位上,已經去到一年前高位阻力;鐵路基建三寶 (0390.HK,1186.HK,1800.HK) 全部黐晒孖筋。我上上星期五 (27號) 買了隻 1800.HK call,搏破頂,上星期一 (30號) 正股可以單日升近20%!我見狀仲唔食糊咩!到復活節假期前已經升多一大蚊,真係吹脹!

現階段,很多當炒股的走勢是呈75度角向上爆,無貨的話真係不知道應該甚麼位入。看圖似乎都是那些大折讓AH股最有值搏機會,最熱炒的幾隻已經升近,甚至升穿了上年公佈滬港通時炒到的高位。小弟現在是不會入貨住,但如果大市真的可以企穩25000點的話,這些折讓股升穿這個滬港通高位的話,就差不多隻隻是大圓底突破,兼無晒蟹貨,計量度升幅可以好和味!

儀征化纖 (1033.HK)

儀征化纖 (1033.HK)

山東新華製藥 (0719.HK)

山東新華製藥 (0719.HK)

東北電氣 (0042.HK)

東北電氣 (0042.HK)

洛陽玻璃 (1108.HK)

洛陽玻璃 (1108.HK)

天津創業環保 (1065.HK)

天津創業環保 (1065.HK)

洛陽鉬業 (3993.HK)

洛陽鉬業 (3993.HK)

南京熊貓電子 (0553.HK)

南京熊貓電子 (0553.HK)

利申:小弟有高陽、金碟、儀征化纖。

Please come and like my Facebook Page if you find my blog interesting: https://www.facebook.com/jailbreakplato

Come like my facebook page!

Come like my facebook page!

Recent Posts

  • 大市要回氣?
  • 其實股災又有咩好怕喎
  • 臨近歲晚,兩隻炒股
  • 真的爆冷了
  • 邊有咁多黑天鵝

Enter your email address to follow this blog and receive notifications of new posts by email.

Top Clicks

  • None
January 2021
M T W T F S S
 123
45678910
11121314151617
18192021222324
25262728293031
« Nov    

Blog Stats

  • 132,976 hits

網誌排行 Top Bloggers

Blog at WordPress.com.

Cancel
Privacy & Cookies: This site uses cookies. By continuing to use this website, you agree to their use.
To find out more, including how to control cookies, see here: Cookie Policy