在這個大風大雨的日子，很多人都喜歡短線搏反彈，因為大家總希望個市會向上升。

講明「搏反彈」，即是睇法偏淡，如果唔係就叫「趁低吸納」啦！所以首要條件就是個市跌得夠殘，因為大方向是向下，所以搏反彈時間唔啱可能會被挾死。總之小心為上，有錯過無買錯。

選股方面，要揀強勢股，雖然升勢未必及弱股的超級反彈力，但勝在夠穩陣及反彈機會率最高。8月時的選擇是當時得令的水泥股、濠賭股等，但時至今日你再攞幅圖來睇，已經走晒樣，一頂低於一頂，好唔對路。老實講，我暫時都搵唔到心水candidate，近來強勢的都是電訊股，等咁多日終於跟個市跌啦！

除了買正股外，可以考慮用warrant。原因有三：
1) warrant 有 leverage effect，可以用少d資金。
2) warrant 用少咗資金，即使輸晒都細銀碼d，萬一睇錯方向，有自動幫你止蝕的作用。例如你買一隻8x leverage 的 warrant，用的是12.5%的資金，跌到0都只是-12.5%。
3) 搏反彈只是短線行為，所以不大怕輸時間值，只怕volatility跌。

最後，搏反彈不要貪心，到心水價就應該take profit；相反睇錯就記得嚴守止蝕，切忌短炒變長揸，否則壓死晒d錢，到market確認轉勢時就真係有心無力了。