近日人人都問：個市跌完未？應該幾時撈底？我的睇法是：繼續等。

想搏反彈的，最好機會是8月9日假「大奇蹟日」恆指跌落19000水平時入貨，當日我見個市低開1000點時都啞咗！因為之前幾日已經用500、1000的速度急跌，估不到仍有1000點可以跌！14天RSI跌到得番20不夠，所以當時反彈的可能性非常高。

個市之後反覆了幾個星期，恆指慢慢又在9月1日升到21000點不夠。有跟開個市的人一定不止一次聽過：21000與21700之間裂口是強大阻力。所以在21000點之前套現是最好時機，進取點的還可以反手沽一下。

到了今日，個市變得唔上唔落，倒不如唞唞。向下望，一個月內恆指在19300附近形成三底，似有很強的支持力；向上望，阻力位先見20000，接著是20500、21000，才看21700。根本就看不通個市的走勢，所以無謂搏。坐定定等個市向上或向下突破後再行動！學JL話齋：DON’T ANTICIPATE！

個人觀點方面傾向偏淡，經濟層面上歐美都等得太久，已病入膏肓，點刺激都好難醫。技術分析上恆指上面阻力位重重，相反下面一旦穿19300三底就幾乎肯定18868難保。

不過都係個句：Don’t Anticipate！