上星期最尾講到：

「總之，個市係跌緊，一日幅圖未轉勢，都唔好理報紙雜誌的專家點講，唔好有幻想跌完！專家們講的是跟我一樣的廢話，只有真金白銀用金錢買賣畫出來的股市圖表才是真理！」

今日問我，都會是同一番說話。上星期人人話個市好超賣，要超賣反彈啦！一個星期過去，今日又是收市在 21200 之下。你問：說好的反彈呢？我就會話：反彈咗啦！你見唔到咩？上星期五在22424高開，比之前20865的低位已經反彈成 1500點！只不過即日單日轉向回800點，收報21612。這樣的走勢，你話點敢話見底呢？

咁究竟甚麼位置才是底？估頂估底從來都是 mission impossible，不過這個 weekend 小弟 update 了之前從曾淵倉博士的著作裡炒出來的「曾氏通道」，可以跟大家分享一下。其實4月的大升市，恆指高位連通道的中軸都未到，就已經回吐下來，所以都不太應該叫它做牛市。現在連「75%悲觀線」都跌穿埋，認真弱雞！通常，就算如2008年的大熊市，恆指都只是跌到落「95%悲觀線」就見底，所以以它做終極底位應該雖不中亦不遠了 (我覺得今次應該去唔到…啩)，而這個位置就是… （登鄧戥瞪……)

17600！

現在21200這個位數落去，仲有成 20% potential downside！灰…… 不過，這只是 worst case scenario，真是落到咁低的可能性未必太高。

至於話恆指已經連跌4個月，所以9月應該起碼彈一彈這道理，聽落好合理，小弟自己亦希望是，不過望一望2008年由31958點跌落10676一役當中，跌足66%都其實只是在尾聲時勉強叫做4個月連跌 (最後一個月是一支長十字星)，所以我們這個8月的第四支陰燭是否算已經打破了歷史呢？會否真的出現有如九珠連環般難得的月線圖五連跌呢？！

PS：人人畫的「曾氏通道」因為起點不同，個通道會有些少出入。小弟的通道起點是1989年。

PS2：小弟未來兩週要離開一下這片傷心地療傷。9月尾再見！唔知到時恆指會是18000定24000呢？

Please come and like my Facebook Page if you find my blog interesting: https://www.facebook.com/jailbreakplato