令人擔心的一面倒

03 Tuesday Feb 2015

Posted by Platoooooo in February 2015

Tags

2015年剛過了一個月，雖然投資市場已經是風起雲湧，自從瑞士自動棄權跟歐元脫勾後，各國爭相鬥貶值，日日新鮮日日甘！不過在香港，投資界似乎只有一種睇法：股市全面看好A股加它的附帶品，如券商股和內險股；匯市全面看淡歐元，對美金短線睇 1.1，長線則見一算。

通常大家咁「團結」看好 / 看淡一項投資，都不是一件好事！慘就慘在其實暗地裡小弟的睇法都是長A股，短歐元！咁點算？？

細心想，買A股其實是買內地政策，我無習總和李總的直線電話，所以話內地政策想造好A股其實都只是跟大圍一樣估估吓！唯一兩項已知的利好消息就是滬港通和 MSCI 遲早會將A股納入。其中滬港通已經炒了半年，MSCI 方面一日未落實都只是樓梯響，即是現階段兩者都無得炒！

其實大家咁鍾情於A股，除了因為它跟香港夠近容易買外，就是喜歡它升升跌跌都夠喪！充滿著一蚊搏十蚊的機會。如果當日你恆指 23000 點時無買港股，它一定會升吓回吓給你上車的機會；但去年年尾如果你上證 2500 點時無上車，你就只能站在揮手區跟它講拜拜，3400 點見！

既然A股的行情無得估，唯有萬變不離其中看圖做人。之前提過，3500點是上證2009年高位的大阻力，短線上個月都在該水平做了個雙頂。所以最簡單是：上證一日不破 3500，一日都可以企埋一邊剝住花生睇阿爺打貪，又或者可以在跌穿雙頂頸線的量度跌幅2800點才買貨。

長線看上證2009年高位3500點是大阻力

至於歐元，歐央行咁義無反顧的做 QE，我真的想不到有什麼理由歐元會有得升，除非美國突然驚覺強美元對自己不利要打壓 (都不能排除這個可能性)。短線來說歐元由 1.3 樓上跌到落 1.1 附近，吊頸都要唞吓氣！現在 1.3 水平向下搏無乜值搏率，歐元弱到咁搏反彈又好危險。小弟就覺得等它一就升上 1.16-1.18 水平再沽過，或者跌穿 1.1 的大位才追沽會化算一點。其實，幅圖的走勢告訴我們，歐元跌破 1.2 算的頸線後，目標是要去 2000-2002 年的低位 0.85 的水平！不過一來這不代表會在 2015 的一年內發生，二來有那一個財演夠膽講到咁激！

歐元跌穿 1.2 頸線後其實是否要看 0.85？！

Please come and like my Facebook Page if you find my blog interesting: https://www.facebook.com/jailbreakplato

37倍的回報！

08 Monday Dec 2014

Posted by Platoooooo in December 2014

≈ 1 Comment

Tags

2823.HK, A股, 上證, 滬港通

過去一兩個星期A股、中資股炒個不亦樂乎，但小弟份新工亦是忙到「不亦樂乎」，你見我一星期都出不了一個 post 就知啦！上星期一的大跌市，我早上開市後不久望一望 aastock:嘩！一開市就跌300幾點。再下一次望個市已經是下午5時多，見到跌600多點呆一呆。

咁你話，我在這星期的狂潮點會有收獲！滿手的股票當中一隻內險、內房、券商股都無，註定要大大的跑輸大市，唉……

不過…

機會是留給有準備的人！我今年7月中寫的《兩個 trading ideas》中提到，上證幅圖似「一隻降落中的747客機的降落軌道，差不多要成功降落在地面上了。我就覺得這是一個走勢的尾聲，很可能突破在即。」而小弟當日都身體力行，買了 long-dated 12月到期的2823 $11 call；然後見隻$12 call 只值 $0.01 咁抵: 升一格已經是升一倍了，正喎！所以手痕又買多少。

幾個月下來，滬港通又遲開車、開了車又無人玩，我對這些12月 call 都打定輸數，反正當日我選擇買call就是想以有限搏無限，預咗輸清都唔心痛。

誰不知今個星期A股開始發狂勁跑，隻 2823 跑得仲癲！咁大隻 ETF 竟然可以一星期有兩日是單日升6%！我隻$11 call 由 deep out-of-money 變 in-the-money，隻 $12 call 都有一日 in-the-money 過！(今日又再見$12!) 面對咁嘅市況，小弟 trading hour 時又無乜時間跟，我的做法是在那兩個升 6% 的交易日的第二天，早上找個時候各日賣了約 1/3 的 holdings, 期中 $12 call 已清倉，因為正股兩星期升了10% 有多仍是 out-of-money ，2823 不繼續升的話月尾都係變廢紙！我當日手痕用 $0.01 買的 call，最高價用 $0.37 賣出，升了37倍！(不是37%！) HOLY COW！這肯定是小弟個人的 personal best！

餘下的 1/3，本來小弟諗住睇定D才決定，畢竟12月還有大半個月；但今日午飯後見隻 2823 又升5%，14天RSI去到90幾，忍不住賣埋！。我覺得A股萬億成交有可能就似今年港股逢千億成交就見頂一様；加上報紙上人人唱好 3000 點不是夢 (well, 今日確實到咗！)，短線可能 top top 地，不過中線小弟都繼續看好，等回吐就食過翻尋味，用部份 profit 照板煮碗買定下年6月的call等運到！