這星期喜歡足球的朋友可能有些失落，因為南美國家盃落幕，東道主智利 (Chile) 在決賽互射十二碼擊敗阿根廷 (Argentina)，捧盃而回！不過，原來在南美旁邊的太平洋島國，都正在舉行太平洋運動會 (Pacific Games)，當中的足球賽事，斐濟 (Fiji) 竟然以 38-0 狂數密克羅尼西亞 (Micronesia) — 請問有無人聽過 Micronesia 這個國家？！

今日相信大家望住港股，就有如 Micronesia 的球員上身般，感到一樣的無奈。

明明阿爺出盡食奶的力在救！救！救！明明上證高開 7.82% — 雖然都是高開低級收 — 明明港股都已經調整多時…… 點解香港都要跌成咁？上個星期恒指才剛試過一日內跌足1000點，今日仲勁，最多跌足1300點！25000都一度失守。

原來又是你班希臘佬搞鬼！

上個週末才令阿爺的「雙降」威力有等於無，今次當人人以為希臘國民會怕脫歐而在公投時接受歐盟和債權人提出的緊縮政策，包括我；結果全世界跌晒眼鏡，希臘人以60：40的大比數否決政策。似乎，希臘總理齊普拉斯 (Alexis Tsipras) 是喪過喪標，但不是傻強，更不是流的 — 很明顯他確實比我們全部人都了解希臘人的想法，這鋪 show-hand 賭贏了。

這次出人意表的公投結果，搞到投資市場手足無措。香港作為全球最自由的金融中心兼提款機；加上早於歐美開市 — 無人知道歐洲、美國市場會如何反應，梗係沽咗先講！

結果，繼上星期一被希臘完勝後，今日的 Round 2 又再是希臘完完勝中國… 不過，這只是上半場而已！事實上，跟希臘最密切的歐洲剛開市，英國、法國、德國股市暫時都只是跌 1-2%，未見恐慌。如果連美國股市都只是平穩跌市的話，香港有可能在明天的下半場可以收復失地。加上阿爺發晒茅咁救市 (你話，MSCI 點敢加入A股呀？) A股即使唔識升，都不會再大跌了吧？！

另外，今日恆指跌近今輪牛市起點 25000，加上連最牛的港交所 (0388.HK)、騰訊 (0700.HK) 等都洗倉式下跌，所有其他股份就最不用多講 — 在20大跌幅榜上，你無跌夠 30% 都過主啦！這會否就是D人成日講的「終極一跌」？？？

明天自有分曉。

小弟個倉由4月1日起到今日跟恒指一樣打回原形。不過，跟當年乳臭未乾時的我經歷2008年熊市很不同，今次這輪絕殺中不論心理上或技術上都大有得著。上次是跌完輸到瞓街都不知道點解，這次是跌完輸到還有屋住兼可以睇番轉頭知道其實逃生的機會多的是，只是自己當局者迷選擇不走。這一浪暴跌經歷已經寫了在自己的 trading notes 中，方便自己將來溫故知新。

例如今日，開市前已經預計即使A股做好，港股都好有機會做希臘事件的 ATM，所以當恆指高開後一開始倒跌，我就立即買了少少即月 25000 點 Put；到中午收市前平倉，算做賺返少少幫補個大閘蟹倉，不過今日都係輸到褲穿窿，好在還不需要去 ICC 排隊住…

最後最後，你問我買得貨未，我偏向相信今日就是大家久等的「終極一跌」。無乜貨的現階段在 25000 點水平開始買贏面高，重貨的就不如等個太陽確定出來了再部署啦！

btw，我次次估底估頂都錯，你真係信我講？連我自己都不大相信自己的看法，所以收市前都是將恆指的 Call / Put 兩邊買晒，搏就算估錯，只要是波動市，爆上或爆落都有得賺。

Please come and like my Facebook Page if you find my blog interesting: https://www.facebook.com/jailbreakplato