今年7月底大市在二萬二關樓下浮沉之際，曹sir曾估計大市可上望23900水平，惟目前港股今年三度在23500關口受阻、加上個別板塊瘋炒現象出現，他昨表示「有啲擔心」，「通常個市到尾聲，啲股就會亂炒一通，但𠵱家係咪尾聲，我未有答案，不過三中全會之前，大家不妨癲落去」。他強調，對大市的目標仍然未變，只是對走勢開始模糊，「我唔知個頂係邊，應該仲搵緊，但如果三中全會有乜冬瓜豆腐唔好怨，市冧之前，通常都冇人響鐘」。

若投資少　每月可減持10%

曹sir昨打趣說，「我近排冇乜胃口，連對股票嘅胃口都無埋」，直指旗下基金自10月開始已小量減持獲利，「你諗吓濠賭科網嗰啲，由我上次話睇二萬四到𠵱家已經升咗好多，係時候take吓profit啦。」他亦認為一般投資者亦要開始考慮在年底前稍為鎖定利潤，「由10月到12月，如果個倉細嘅，每個月可減持5至10%。」
恒指昨早一度高見23534點，惟期後升幅收窄，報23438點，升98點或0.4%；雖然滬綜指大升1.6%，惟H指昨仍一度倒跌，收報10668點，升24點，全日主板成交額603億元，沽空佔9.1%。港匯持續呈強，昨亞洲交易時段一度高見7.7507，一度逼近一個月前的即市高位。……

(http://hk.apple.nextmedia.com/financeestate/art/20131022/18474002)

升市莫估頂，所以當一切還是歌舞昇平之時，縱使背後暗潮洶湧，一於少理，繼續股照炒。

最近炒股手風還算順，雖然恆指過去一個月等同在 23000 點上下玩搖搖板，但我的荷包都有所進脹！希望這是因為我技術上和心理上進步了！

面對現在這個唔上唔落兼心驚驚怕一個唔覺意股災的市況，我又沒有刻意減持。我只會為每一隻中短線的股票每星期入好止蝕 (止賺) 盤。這樣一來，有時間的話可以望住個市；即使是忙的時候，亦不用擔心有什麼壞消息！如果大市是要跌的話，就讓它們一下子全止蝕好了！到時我又手揸現金，慢慢揀貨買！

有時候感到個市不太安穩之時 (例如國債上限到期之前)， 我就會相應地將止蝕放近一點，以防有什麼冬瓜豆腐個市大插插時，輸少D。

當然，有些時候個市可能只是 chok一chok，在低位觸發我某些止蝕位後又飆上去。這些情況都無辦法啦，只可以望股輕歎，不過現在的我對這些都看得透徹多了：這隻股賺不到錢，香港股市還有上千隻其他股讓我揀。

講返個市，我估可以升得穿 23500，不過 24000 又是下一個阻力。但我一貫地說：炒股唔炒市，你呢期求其扑中一隻騰訊 (0700.HK)、銀河 (0027.HK)、金山 (3888.HK)、長城 (2333.HK)、合生元 (1112.HK) 等等的話，23500 定 24000 又何干？？

Please come and like my Facebook Page if you find my blog interesting: https://www.facebook.com/jailbreakplato