在歐盟千辛萬苦達成協議，開香檳慶祝連啖香檳都未落到胃時，希臘總理帕潘德里歐突然玩嘢，宣佈要返屋企全民公投才肯接納歐盟的方案。一個要希臘挨窮的方案，你係希臘人的話，平日習慣了洗腳唔抹腳，你肯唔肯？

所以全世界都頭都大埋，歐盟班大佬差d爆血管 — 點解帕-san 突然話要搞公投？

我知點解。

即使希臘肯接受歐盟與各債權人達成的債務重組方案，講真，以希臘的經濟情況，真係還幾世都未必還得清，試問帕-san 又點會唔知呀？他開完會返到希臘，係屋企攝高枕頭諗清楚，覺得問題始終是「未解決」！咁有什麼計仔呢？

終於，帕-san 諗到一條背城借一，兵行險著的絕世好橋，可以將事情一了百了。「我們希臘今時今日的景況，想令全世界的金融市場歌舞昇平就話難啫，但如果我想搞到個市雞犬不寧，容乜易！咁只要我放風搞到環球大冧市，再預早借盡孖展沽定d期指、歐羅，買定d CDS，就可以一鋪賺番晒啦！到時不單止可以還清晒希臘條街數，隨時仲有錢剩。我又不再需要國會通過什麼什麼緊縮政策，班希臘人唔再嬲我，咁我呢個總理位應該坐多一兩屆都 no problem！反正歐盟班友仔要投資者硬食債務重組，橫又輸掂又輸，倒不如我清脆俐落贏佢地一次，佢地輸得無咁唔順氣啦！」

於是乎帕-san 立刻 call 齊人馬，商討點做。最簡單當然是搞到希臘好似就要破產咁，嚇到大家以為歐豬又唔掂啦！走鬼啦~~~ 但歐盟剛剛幫我地爭取到50% haircut，全世界好似乜事都無啦，個個 market 都升到把把聲，好壞消息都向上炒，點好呢？

幸好，只等了一天，機會就來了。MF Global 因為揸了太多的歐豬債券終於頂唔順爆煲，星期一宣佈破產，環球市場好像突然從美夢中驚醒，市場氣氛又開始轉向悲觀。此時不出手，更待何時？！跟著的情節，我想大家都已經知道了。帕-san 在希臘在國會宣布舉行公投，市場認定公投一定不會通過而令環球股市大插插… 如果帕-san 昨晚在美國收市前平晒所有淡倉，應該好快就會宣佈希臘已經還清所有債務，走出陰霾，東山再起！！

(以上內容純屬老作，請 FBI、SFC、KG5、占士邦等等不要以為我有什麼內幕料捉我番去…)